Hebogiaid ar dŵr y cloc

Newyddion

Croeso'n ôl i'r hebogiaid tramor ar Dŵr y Cloc 2009!

’ Darllen y blog

Llynedd magodd ein hebogiaid tramor preswyl dri chyw'n llwyddiannus.

Ond nid oedd yn flwyddyn hawdd iddyn nhw am fod dau gyw wedi ymadael â'r nyth ychydig yn gynnar. Fel canlyniad roedd gwylanod wedi ymosod arnyn nhw a chawson nhw eu hachub o'r heolydd o gwmpas Neuadd y Ddinas gan aelodau o'r cyhoedd. Erbyn hyn ymddengys eu bod wedi ymadael â'u cartref o'r diwedd.

Yn ffodus mae'r rhieni gyda ni o hyd ac mae'n ymddangos eu bod yn bwyta'n dda o farnu yn ôl yr ysgerbydau colomennod sydd i'w gweld yno.

Croesi bysedd am ragor o gywion hebogiaid tramor eleni.

O 4 Ebrill hyd 31 Awst 2009

Galwch i mewn i Amgueddfa Genedlaethol Caerdydd 10am–4pm Mawrth-Sul i gwrdd â staff yr RSPB i ddysgu mwy am yr adar diddorol hyn. Bydd gyda nhw delesgopau a sbienddrychau i chi gael gweld yr adar yn agos.

Am y hebogiaid

Hebogiaid Tramor
Adar cyflyma’r byd!

Mae hebogiaid yn hoffi nythu mewn llefydd uchel, lle na fydd neb yn tarfu arnynt. Felly mae tŵr cloc Neuadd Dinas Caerdydd yn lle delfrydol. Gallant weld eu hysglyfaeth yn rhwydd o ben y tŵr.

Maen nhw’n bwyta amrywiaeth eang o adar, o fronfreithod i golomennod. Wrth ymlid ysglyfaeth, gallant hedfan cymaint â 180 cilomedr yr awr (112 milltir yr awr).

Mae hebogiaid yn tueddu i baru am oes. Mae’r heboges yn dodwy 3 neu 4 wy ac mae’r cywion yn gadael y nyth ymhen 4 mis fel rheol.

Os bydd hebogiaid Neuadd y Ddinas yn cael cywion, gallwn ni ddisgwyl gweld arwyddion o fywyd newydd yn y nyth ym mis Mai.

Aderyn mewn perygl ar ei ffordd nôl

Mae Hebogiaid Tramor wedi bod mewn perygl ers amser maith. Mae pobl wedi bod yn euog o ddwyn eu hwyau; eu saethu a hyd yn oed eu gwenwyno.

Roedd y plaladdwyr a ddefnyddiwyd yn gyffredin yn ystod y 1950au a’r 1960au yn lladd yr adar mewn oed ac yn gwanhau plisg eu hwyau gan beri iddyn nhw dorri wrth ddeori.

Mae gwell amddiffyniad cyfreithiol a rheolaeth ar blaleiddiaid wedi helpu i gynyddu nifer yr hebogiaid yn y DU o 400 pâr yn y 1960au i bron i 1,500 o barau heddiw.

Ond mae angen ein cymorth ni arnynt o hyd. Bob blwyddyn mae adar yn cael eu saethu neu eu gwenwyno, a nythod yn cael eu hysbeilio.

Mae angen gwneud rhagor i amddiffyn yr adar hynod hyn. I gael rhagor o wybodaeth am ffyrdd o helpu, ewch i www.rspb.org.uk/birdsofprey.

Digwyddiadau RSPB y dyfodol yn Amgueddfa Genedlaethol Caerdydd

Archwilwyr Byd Natur Caerdydd

Ymunwch ag...

Archwilwyr Byd Natur Caerdydd - clwb natur misol lle cewch gyfle i ddysgu am y bywyd gwyllt sydd o’n cwmpas, o gacwn i flodau’r gog, ac o lygaid y dydd i bathewod, wrth gymryd rhan mewn gemau a gweithgareddau difyr.

Pryd?

Dydd Sadwrn olaf pob mis rhwng 10.30am a 12.30pm.

Ar gyfer pwy? Unrhyw un rhwng 5 a 12 oed. Rhaid ymuno â’r grŵp yn gyntaf.

Ymunwch â’r grŵp

Os hoffech ddysgu mwy neu ymuno a’r grŵp cysylltwch ag arweinydd y grŵp, Claire Pooley, ar 07730 510131 neu claire_pooley@hotmail.com

Ffotograffiau Flickr

Cysylltiadau

RSPB

http://www.rspb.org.uk/wildlife/birdguide/name/p/peregrine/index.asp

Adar campus cymru!

http://www.rspb.org/birds/brilliant