Gweddnewid Dyfodol Plant
...drwy greu llwybrau ar gyfer cyfranogiad diwylliannol
Strategaeth Amgueddfa Cymru i gefnogi cyfranogiad mewn gweithgareddau diwylliannol ar gyfer plant, pobl ifanc a theuluoedd mewn tlodi 2012-2015
Rydym am glywed eich barn...
Bydd y cyfnod ymgynghorol yn parhau hyd at 20 Mawrth 2012. Yn ystod y cyfnod hwn rydym yn ceisio casglu mewnbwn gan ystod mor eang ag sy'n bosibl o fudiadau ac unigolion. Anfonwch eich ymateb naill ai drwy ebost at
ymgynghori@amgueddfacymru.ac.uk
neu trwy lythyr at:
Gweddnewid Dyfodol Plant, Amgueddfa Cymru, Parc Cathays
Park, Caerdydd CF10 3NP.
Cofiwch gynnwys eich manylion cyswllt os hoffech dderbyn ymateb. Mae Amgueddfa Cymru yn cydymffurfio â Deddf Diogelu Data 1998 fel y nodir yn ein Polisi Gwarchod Data.
Er ein bod yn gofyn am eich ymateb i'n cwestiynau ar ochr dde'r dudalen, hoffem hefyd i chi roi eich sylwadau a'ch adborth ym mha bynnag ffyrdd sy'n addas i chi.
Yn ystod yr ymgynghoriad byddwn yn siarad yn uniongyrchol â phlant sy'n byw mewn cartrefi incwm isel a'u teuluoedd, gan ofyn beth gall eu hamgueddfeydd cenedlaethol wneud drostynt. Os ydych yn gweithio mewn ysgol, ac am gymryd rhan, cysylltwch â ni. Byddwn yn cynnal cyfres o seminarau ym mhob un o'n hamgueddfeydd cenedlaethol er mwyn i ni ymgysylltu ag arbenigwyr sector o elusennau, awdurdodau lleol a'r rhai sy'n cyfranogi ar hyn o bryd mewn Partneriaethau Plant a Phobl Ifanc ar lefel leol. Byddwn hefyd yn trefnu cynhadledd i'w chynnal yn ystod haf 2012 i ystyried swyddogaeth amgueddfeydd wrth herio tlodi plant
Ymatebwch i'r cwestiynau sy'n berthnasol i chi/eich mudiad
Beth ddylai Amgueddfa Cymru ei wneud i gynyddu hygyrchedd a mynd i'r afael â thlodi cyfranogiad?
A yw ein strategaeth yn briodol a pherthnasol? A oes bylchau yn y strategaeth?
Ble ddylid targedu ein hadnoddau i gael y budd mwyaf?
Pa ardaloedd daearyddol ddylai Amgueddfa Cymru eu targedu? Pa bartneriaid dylid ymgysylltu â nhw? Sut dylid cynhyrchu rhagor o bartneriaethau? A fyddech yn ystyried bod yn bartner i gyflawni'r strategaeth hon?
A ydych yn rhagweld unrhyw rwystrau rhag ymgysylltu ag Amgueddfa Cymru?
Wedi gwrando ar yr hyn sydd gennych i'w ddweud am ein strategaeth, byddwn yn datblygu cynllun gweithredu blynyddol (fel dogfen i gyd-fynd â'n Cynllun Gweithredu blynyddol) fydd yn gosod ein nodau, amcanion, mesurau a chanlyniadau ar gyfer y flwyddyn yn glir. Bydd yn cael ei gyhoeddi erbyn diwedd mis Ebrill 2012. Rydym yn cydnabod y byddwn fwyaf effeithiol wrth weithio gyda phartneriaid sy'n treulio'u holl amser yn gweithio'n uniongyrchol gyda phlant, pobl ifanc a theuluoedd sy'n byw mewn tlodi a'u cefnogi. Rydym yn ymrwymo i weithio gyda phartneriaid sy'n medru cydweithio â ni yn y modd hwn. Fel sefydliad cenedlaethol, byddwn yn mapio'r gweithgaredd yn y cynllun gweithredu er mwyn sicrhau ein bod yn mynd i'r afael â thlodi cyfranogiad yn yr ardaloedd o Gymru lle mae'r angen mwyaf.
