John Piper: Mynyddoedd Cymru – Paentiadau a Darluniau o Gasgliad Preifat
John Piper
Olew ar gynfas ar fwrdd
Ar fenthyg o gasgliad preifat
© Ystâd John Piper
John Piper
Olew ar gynfas ar fwrdd
Ar fenthyg o gasgliad preifat
© Ystâd John Piper
Llwyfan i gasgliad preifat rhyfeddol o weithiau gan John Piper yw’r arddangosfa hon.
Bu Piper yn byw ac yn gweithio am gyfnodau yng ngogledd Cymru dros 15 mlynedd yn y 1940au a’r 1950au.
John Piper yw un o ffigyrau blaenllaw celf yr ugeinfed ganrif yng ngwledydd Prydain. Mae ei waith yn cynnwys portreadau, tirluniau, astudiaethau archaeolegol, bywyd llonydd, cerameg a chynlluniau ar gyfer tapestri a gwydr lliw.
Roedd ganddo ddiddordeb mawr mewn tirweddau a phensaernïaeth ym mhob cwr o Brydain, gan gynnwys Eryri.
Ei luniau dramatig o fynyddoedd gogledd Cymru yw testun yr arddangosfa hon.
Mae’r arddangosfa hon yn cynnwys cyfres wych o olygfeydd o Eryri ac yn eu cyflwyno yn eu cyd-destun.
Roedd mynyddoedd y Gogledd yn ysbrydoliaeth aruthrol i Piper rhwng dechrau’r 1940au a chanol y 1950au, pan fu’n rhentu dau fwthyn, Pentre a Bodesi, yn ardal Eryri.
O’i fwthyn, byddai’n crwydro ar hyd a lled y dirwedd rewlifol er mwyn cyfleu prydferthwch garw’r mynyddoedd.
Arlunydd yr awyr agored oedd Piper yn bennaf, gan wneud brasluniau o’r mynyddoedd a’r llynnoedd ym mhob tymor, glaw a hindda. Roedd effeithiau hyn ar liwiau’r creigiau yn rhan ganolog o’i waith.
Yn ogystal ag effaith y tywydd a’r golau, roedd gan Piper ddiddordeb mawr yn naeareg yr ardal. Mae llawer o’r darluniau a’r paentiadau a welwch yma’n dangos gallu arbennig yr artist i gofnodi pob manylyn daearegol.
Ymunwch â ni ar daith drwy rai o’r lleoliadau a welir ym mhaentiadau John Piper ar 21 Ebrill gyda Melissa Munro, Curadur Celf Fodern a Chyfoes Derek Williams a Dr Richard Bevins, Ceidwad Daeareg Amgueddfa Cymru.
Cafwyd cefnogaeth hael gan Ymddiriedolaeth Elusennol Colwinston, Sefydliad Paul Mellon ac Ymddiriedolaeth Derek Williams. I gyd-fynd â'r arddangosfa, mae catalog gan y curadur Melissa Munro sydd hefyd yn cynnwys traethawd gan David Fraser Jenkins.
Nôl i dudalen cyntaf Digwyddiadau
