Amgueddfa Cymru

Bydd pum paentiad newydd gan yr artist a’r diddanwr enwog Rolf Harris yn cael eu harddangos mewn amgueddfeydd ac orielau ar hyd a lled Cymru fel rhan o gyfres gelfyddydol newydd BBC Cymru Wales, Rolf on Welsh Art.

Bydd Rolf Harris yn ymweld ag Amgueddfa Genedlaethol Caerdydd ar ddydd Mercher 16 Chwefror i drafod y gyfres ac i ateb cwestiynau mewn sgwrs gyda chyflwynydd Rhaglen Gelfyddydol BBC Radio Wales, Nicola Heywood-Thomas. Mae’r sesiwn yn rhad ac am ddim a bydd yn dechrau am 2pm.

Y paentiadau yw ffrwyth ymdrech Rolf i greu gwaith cwbl newydd ar gyfer y sioe yn arddull y pedwar artist dan sylw – Syr Kyffin Williams, Graham Sutherland, Josef Herman a Shani Rhys James.

Roedd yn rhaid i Rolf wynebu sawl her artistig oedd yn gwbl newydd iddo, gan gynnwys:

• Paentio gan ddefnyddio cyllell balet yn unig er mwyn ceisio efelychu dull unigryw Syr Kyffin

• Edrych ar ei adlewyrchiad mewn drych llaw wrth beintio, fel mae Shani Rhys James yn ei wneud

• Codi gwrthrychau o Sir Benfro i’w cynnwys yn ei ddehongliad ef o waith Graham Sutherland

•  Ail-wneud ei fersiwn ef o waith Josef Herman am nad oedd ei ymdrech gyntaf yn ddigon “sylweddol”

Mae’r paentiadau i’w gweld yn y lleoliadau partneriaeth canlynol:

Oriel Ynys Môn, Llangefni

Oriel Glynn Vivian, Abertawe

Oriel y Parc, Tyddewi, o Chwefror 11 ymlaen

Amgueddfa Genedlaethol Cymru (Shani Rhys James), o Chwefror 16 ymlaen