Ratatosk

Bywgraffiad

Yn wreiddiol, gwiwer ddrygionus o fytholeg y Llychlynwyr yw Ratatosk, ond yn y cyd-destun hwn mae’n cyfeirio at hogyn o’r enw Rhodri Viney.

Mae Rhodri wedi perfformio ac wedi rhyddhau cerddoriaeth o dan yr enwau Teflon Monkey a Broken Leaf, ac wedi chwarae rhan bwysig mewn bandiau fel Right Hand Left Hand a Vito. Yn ogystal â hyn mae wedi chwarae’n fyw ac ar recordiau gyda Gorky’s Zygotic Mynci, The Secret Show, Brave Captain, Cymbient, Little My a llu o fandiau eraill.

Gellir disgrifio cerddoriaeth Ratatosk mewn dau air – diflasedd a minimaliaeth. Os yw’r motiff gwreiddiol yn ddigon trist a melancolaidd i ddod â deigryn i’r llygad, yna caiff ei archwilio a’i ehangu trwy ail-adrodd Zen ei natur, bron, gan ddefnyddio haenau o gitarau, lleisiau, piano, llif gerddorol a’r pedal steel.

Mae Ratatosk wedi cael ei ddylanwadu gan unigolion sy’n torri eu cwysi eu hunain – ac mae pobl fel Brian Eno, Matt Elliott, Yann Tiersen, Leonard Cohen, Arvo Part, Eluvium, Rhys Chatham, Tom Waits a William Basinski oll wedi gadael eu marc arno, yn ogystal â phawb sydd wedi canu can drist ar noson oer.

Sylwadau ar y ‘gân’:

“Mae meddwl am yr holl hanes sydd wedi digwydd ar ddarn penodol o dir wedi fy hudo erioed – boed hynny’n gastell, stryd neu ardd rhywun – ac mae’r amffitheatr yng Nghaerllion yn berffaith ar gyfer hyn; syrthiais mewn cariad â’r lle y tro cyntaf i mi ei weld.

Seiliwyd y syniad am Damnati Ad Bestias (Damniedig i’r Anifeiliaid) ar fy syniad am Gladiator unig, lluddedig a llawn creithiau, sydd wedi gweld nifer o’i gyfeillion a chyd-frwydrwyr yn marw dros y blynyddoedd. Yn ystod ennyd dawel o fewnsyllu, mae eu heneidiau ingol yn dod i ymweld ag e…”

www.myspace.com/ratatoskisnow