Quintamity

Am Quintamity

Treuliodd Ashley McAvoy y rhan fwyaf o’i arddegau yn breuddwydio am fod mewn band roc enwog. Arweiniodd hyn yn uniongyrchol at “y syniad annoeth, ond penderfynol, y freuddwyd amhosibl - a gefais i ac ambell ffrind ysgol oedd yr un mor wallgof - i gael cytundeb gwerth miliwn triliwn o ddoleri gydag un o’r labeli recordiau mawr.“

Ar ôl gwario ffortiwn yn recordio bron i gant o ganeuon, dim ond un EP pedwar trac llwyddodd y band ei ryddhau, a gwerthwyd llai na 200 copi ohoni. Yn ôl Ash, roedd rhai o’r adolygiadau “ymysg y gwaethaf i mi eu darllen erioed”.

Wedi’i chwerwi a’u bychanu, chwalodd y band. Ond yn hytrach na rhoi’r ffidl yn y to, penderfynwyd bod bod mewn band er ei fwyn ei hun yn well na pheidio bod mewn band o gwbl.

Dyna ddechrau Vito, casgliad o unigolion sy’n obsesu ar bedalau oedi a chreu ias ôl-roc sydd hyd yma wedi rhyddhau dau albwm trwy’r label The Flowershop Recordings, sy’n cael ei rhedeg gan Robin Proper-Sheppard (God Machine/Sophia).

Wedi’i ysbrydoli gan ddull gonest ac emosiynol Robin o gyfansoddi, mae Quintamity wedi datblygu i fod yn allfa ar gyfer y gerddoriaeth mae Ash yn teimlo sy’n rhy bersonol i’w rannu â’r band, er nad yw hyn wedi’i stopio rhag gwahodd aelodau o Vito i ymuno ag ef i ddathlu ei “ddiflastod”, at ddibenion recordio a chwarae’n fyw.

Yn gerddorol, dechreuodd Ash rhywle tua dechrau’r 70au gydag ochr fwy gwerinol Led Zeppelin, ac mae’n gobeithio cyrraedd rhywle’n agos i’r Doves neu Kings of Convenience. O ran ei eiriau, dywed nad oes modd esgus fod ganddo strategaeth ond ysgrifennu’r geiriau wrth eu bod yn dod allan, ac mae’n gobeithio na fydd y bobl agosaf ato’n eu cymryd yn rhy bersonol. Wedi’r cyfan, “dim ond geiriau” ydyn nhw.

Am y trac Stone Over Bones:

“Rhai blynyddoedd yn ôl es i gyda Dr Steve Burrow i weithio ar arolwg o Bryn Celli Ddu yn Ynys Môn tua adeg cyhoeddi ei lyfr, Cromlechi Cymru. Roedd yn anrhydedd mawr cael dysgu am ein hynafiaid yn uniongyrchol gan un o arbenigwyr y DU.

Yn ystod ein trafodaethau, dychwelais dro ar ôl tro i’r syniad syml bod y beddrodau hyn wedi’u hadeiladu gan y byw i fynegi cariad a pharch tuag at y meirw. Felly a minnau’n rhamantydd yn y bôn, cefais ysbrydoliaeth i ysgrifennu’r gan Stone Over Bones.

Er mai ychydig iawn y gwyddom am fywydau byrhoedlog ein hynafiaid, fe’m syfrdanwyd gan y syniad y bydd yr emosiwn ynghlwm â’u hymdrechion i goffau’r meirw yn para am byth - fel ein cerddi, molawdau a’n caneuon serch ni heddiw.”