The 2 Billies

Bywgraffiad

Mae'r 2 Billies yn gasgliad o gerddorion sy'n dod o wahanol lefydd a chanddynt swyddi llawn amser yn ogystal â chwarae mewn band.

Ers cael ei sefydlu mewn gardd yn Norfolk mae'r band wedi newid ei gerddorion yn gyson gan gynnwys adeg yn y nawdegau hwyr pan oedd y band yn perfformio o gwbl.

Ymadawodd sawl aelod â'r band i ennill bywoliaeth mewn meysydd megis archwilio'r arctig, bod yn brifathro, darparu'r sgrechfeydd ar gemau cyfrifiadurol a gweithio i Amgueddfa Cymru.

Ailgyneuwyd tân y band gan ei chwaraeydd bas gwreiddiol a'r pethau mae'n eu cadw yn ei sied. Erbyn hyn mae gan y 2 Billies agwedd ffwrdd-â-hi at gynhyrchu caneuon cartref gan ddilyn rysáit gyfrinachol y teulu.

Cafodd y 2 Billies ei ysbrydoli gan alwadau'r corystlum sydd i'w clywed yn y coed yn Sain Ffagan: Amgueddfa Werin Cymru.

Meddai Trevor Bailey o'r 2 Billies am y trac:

“Pan fo'r ystlumod yn oer ac yn llonydd maent yn mynd yn swrth. Felly ychwanegais chwyrniadau bach rhyfedd ar ddechrau'r trac.

Recordiais alwadau ecoleoli'r corystlum gydag ystlumleolwr sy'n eu newid i seinamleddau is fel gallwn eu clywed. Gall ystlumod fapio'r byd o'u cwmpas a dal pryfed yn y tywyllwch drwy wrando ar yr atseiniau i'w galwadau. Maent yn newid o amleddau isel i uchel ac yn ôl a cheisiwn efelychu hynny yn y cefndir ar y gitâr. Hanner ffordd drwy'r trac mae'r ystlum yn hedfan i'r ogof i fwydo'r ystlum bach â phryfed.

Ond un ystlum bach mae pâr o gorystlumod yn ei fagu bob blwyddyn. Mae galwad y bychan yn unigryw fel gall y rhieni ei adnabod ymhlith y cannoedd o'r rhai eraill yn y nythfa. Mae'n well gan gorystlumod nythu mewn coed ac adeiladau ond roedd angen i mi gael esgus i ychwanegu synau o'r afon roedd gennyf wrth law a chynyddu'r sŵn yn sylweddol.”