Darganfod - Addysg: Amgueddfa Genedlaethol Cymru

Bydd y sesiwn 1 awr* hon yn gyfle i blant ddod i ddeall gwrthrychau amgueddfa real a replica drwy archwilio ar eu liwt eu hunain.

Amlinelliad o'r Gweithdy:

Gweithgaredd	Cyswllt Cwricwlwm	Amser
Gwaith cylch lle y byddwn yn trafod beth mae'r plant yn ei wybod yn barod am amgueddfeydd a'u gwaith. Trafod pam na allwn ni drin gwrthrychau amgueddfa fel arfer a rôl labeli a phaneli gwybodaeth mewn orielau.	Iaith, llenyddiaeth a chyfathrebu. Gwybodaeth am a dealltwriaeth o'r byd	10 mun
Archwilio – y plant yn archwilio casgliadau'r oriel drwy ddefnyddio chwyddwydrau a microsgopau.	Gwybodaeth am a dealltwriaeth o'r byd	20 mun
Dewis a labelu – bydd disgyblion yn dewis un gwrthrych o'r oriel i'w arddangos yn 'amgueddfa'r dosbarth'. Byddant yn defnyddio'r deunydd ymchwil yn yr oriel i greu label deniadol ar gyfer y gwrthrych.	Datblygiad creadigol Iaith, llenyddiaeth a chyfathrebu.	20 mun
Amgueddfa'r dosbarth. Pan fydd y gwrthrychau i gyd wedi'u gosod yn amgueddfa'r dosbarth bydd y disgyblion yn cael eu hannog i rannu eu hoff wrthrychau gyda'u cyfoedion.	Iaith, llenyddiaeth a chyfathrebu	5 mun

*gellir amrywio amseroedd yn unol â gofynion y grŵp

Gall y sesiynau darganfod ddilyn thema hefyd, gyda phwyslais ar wrthrychau penodol yn ein casgliad. Yn y gorffennol, rydym wedi cynnig sesiynau thematig ar gerrig, deinosoriaid, llosgfynyddoedd, esgyrn a phenglogau, bwystfilod bach a glan y môr. Mae croeso i chi gysylltu â ni os hoffech chi astudio thema yn fanylach.

Yn yr ysgol – rhai syniadau am waith dilynol

Amgueddfa Fach

Gofynnwch i'r plant ddod â gwrthrych diddorol o'r cartref i'w arddangos mewn amgueddfa fach, e.e. rhywbeth o wyliau tramor neu ddiwylliant gwahanol, pethau naturiol fel cragen fawr neu hen bethau fel gêm neu ffotograffau. Gofynnwch i'r plant ysgrifennu eu label eu hunain yn esbonio pam fod eu gwrthrych yn ddiddorol neu'n bwysig.

Archwilio gwrthrychau

Gellid gwneud y gweithgareddau canlynol gan ddefnyddio gwrthrychau o'ch amgueddfa fach, neu grŵp o eitemau wedi'u dewis. Gellid defnyddio ffotograffau o wrthrychau hefyd.

Trefnu

Rhannwch y plant yn grwpiau bychain a rhowch ddetholiad o wrthrychau iddynt (ceisiwch ddefnyddio cymysgedd o wahanol ddeunyddiau, siapau a lliwiau). Rhowch 'gylchoedd trefnu' i'r grwpiau (cylchoedd bach plastig, platiau papur, neu gortyn ar siâp cylch hyd yn oed). Dylent rannu'r gwrthrychau yn gategorïau gwahanol. Mae hon yn ffordd wych i blant ymarfer sgiliau cyfathrebu a gwneud penderfyniadau. Ar ddiwedd y sesiwn, gofynnwch i bob grŵp ddangos eu penderfyniadau a'u hesbonio i'r dosbarth. Trafodwch y dulliau gwahanol o benderfynu, efallai y bydd rhai grwpiau yn dewis eu rhannu yn guradurol (deunydd, oed ayb), tra bod grwpiau eraill yn defnyddio themâu. Byddai'r ymarfer hwn yn gyflwyniad da i'r egwyddor o ddosbarthu pethau byw.

Beth ydw i?

Gofynnwch i blentyn ddewis gwrthrych o amgueddfa'r dosbarth (heb ddweud wrth unrhyw un!). Dywedwch wrthyn nhw ddisgrifio'r gwrthrych i'r dosbarth (heb ei enwi). Mae'n rhaid i weddill y dosbarth ddyfalu pa wrthrych sy'n cael ei ddisgrifio. Dewis arall fyddai i'r dosbarth dynnu llun y gwrthrych ar sâl y disgrifiad.

Cerddi Siâp

Mae cerdd siâp yn disgrifio gwrthrych ac wedi'i ysgrifennu yn siâp y gwrthrych. Gofynnwch i'r plant ddewis eu hoff wrthrych o'u hymweliad â'r amgueddfa. Gofynnwch iddyn nhw feddwl am eu rhesymau dros ddewis y gwrthrych a rhai geiriau i'w ddisgrifio. Gofynnwch iddyn nhw ysgrifennu'r rhain mewn 'banc syniadau' ar gyfer eu cerdd. Yna gofynnwch iddyn nhw dynnu amlinelliad o'r gwrthrych ac ysgrifennu eu cerdd yn y siâp.