Bwyd y môr - Addysg: Amgueddfa Genedlaethol y Glannau
Hyd:
3 gweithgaredd.
Lle ar gyfer:
3 grŵp, hyd at 30 o ddisgyblion ym mhob un.
Addas ar gyfer:
Plant meithrin – blwyddyn 2.
Nod:
Nod gweithgareddau’r bore yw rhoi cyfle i blant ddysgu am y diwydiant pysgota yng Nghymru, ddoe a heddiw.
Cocos a chregyn gleision:
Mewn sesiwn a hwylusir, bydd y plant yn cwrdd ag actores sy’n chwarae rhan casglwr cocos Cymreig. Byddant yn dysgu am draddodiadau ac arferion casglu cocos yn ardal Bae Abertawe, a hefyd hanes y diwydiant cregyn gleision yn y Gogledd. Bydd cyfle i rai o’r plant wisgo fel gweithwyr pysgod, gan gymryd eu hysbrydoliaeth o hen luniau.
Blychau archwilio:
Mewn sesiwn dan arweiniad athro, bydd y dosbarth yn rhannu’n grwpiau i drafod cynnwys a gweithgareddau’r blwch Bwyd y môr. Anogir plant i feithrin sgiliau iaith a sylwi trwy ofyn ac ateb cwestiynau. Rhaid i oedolyn o’r ysgol fod yn gyfrifol am bob grŵp a blwch. Bydd canllawiau ar gael i’r oedolion ar gyfer pob gweithgaredd, sy’n cynnwys rhestr o gwestiynau, esboniadau a gwybodaeth berthnasol arall.
Llwybr y môr:
Mewn sesiwn dan arweiniad athro, bydd y dosbarth yn rhannu’n grwpiau (gydag oedolyn yn gyfrifol am bob un) i gwblhau’r llwybr. Anogir plant i feithrin sgiliau iaith a sylwi, wrth iddyn nhw chwilio am eitemau gwahanol o amgylch yr Amgueddfa.
Bydd cyfres o gardiau wedi’u lamineiddio ar hyd y llwybr, yn dangos yr eitemau mae’n rhaid i’r plant eu darganfod. Ar ôl ffeindio’r eitem, bydd yr oedolyn yn darllen gwybodaeth amdani i’r plant. Wedyn, byddant yn nodi beth yw’r cysylltiad rhwng yr eitem â’r môr.
Amser rhydd:
Efallai yr hoffai athrawon fynd â’r plant am dro i’r ardal leol – gallwch gerdded i draeth Abertawe a marchnad y ddinas a’i stondinau pysgod.
Canlyniadau bwriedig:
- Datblygu sgiliau arsylwi wrth edrych yn ofalus ar eitemau ac arddangosfeydd.
- Datblygu sgiliau iaith wrth ofyn ac ateb cwestiynau am eitemau ac am y gorffennol.
- Meithrin dealltwriaeth o sut mae’r môr wedi chwarae rhan bwysig yn hanes Cymru.
- Meithrin dealltwriaeth o fwyta’n iach.
