Datganiadau i'r Wasg

Cafodd y lleoliadau y gweithiodd yr artist Graham Sutherland (1903-1980) ynddynt ddylanwad mawr arno ac yn ystod y 1930au datblygodd weledigaeth bersonol iawn o dirwedd Sir Benfro. Meddai, ‘I felt as much a part of the earth as my features were part of me’. Yn ogystal â gwaith ar fenthyg o gasgliadau Amgueddfa Cymru, bydd arddangosfa newydd Bwrw Gwreiddiau: Sutherland a’r Dirwedd Ramantaidd (16 Mawrth-8 Gorffennaf 2013) yn Oriel y Parc hefyd yn cynnwys benthyciad o waith pwysig gan Sutherland o gasgliadau’r Tate, sef Tirwedd Ddu. Paentiwyd Tirwedd Ddu rhwng 1939 a 1940, a dyma un o’r enghreifftiau orau o waith cynnar Sutherland yn Sir Benfro.

Mae un o artistiaid tecstilau mwyaf adnabyddus y byd yn dod i Orllewin Cymru am y tro cyntaf eleni, a hynny er mwyn cynnal nid un, ond dwy arddangosfa o’i waith neilltuol. Ganwyd Kaffe Fassett yn America ond mae’r artist wedi bod yn byw ac yn gweithio ym Mhrydain ers sawl degawd. Mae’n adnabyddus am ddylunio tecstilau gwefreiddiol a defnyddio lliw mewn modd tanllyd a dramatig. Gan ddechrau gyda gweuwaith nôl yn y 1960au, dros y blynyddoedd mae wedi defnyddio techneg blaen nodwydd, mosaigau, rygiau, cwiltiau a llawer mwy. Am y tro cyntaf mae Kaffe Fassett yn arddangos yng Nghymru ac mae’n gyfle arbennig i weld dwy elfen o’i waith. Ei gwiltiau fydd canolbwynt yr arddangosfa yng Nghanolfan y Cwilt Cymreig yn Llanbed (9 Mawrth-2 Tachwedd) , tra bydd Amgueddfa Wlân Cymru yn Dre-fach Felindre, yn arddangos ei weuwaith o 8 Mawrth-2 Tachwedd).

Gyda’r gwanwyn, daw tair arddangosfa celf gyfoes newydd i Amgueddfa Genedlaethol Caerdydd. Mae arddangosfa Pop a Haniaethol yn cynnwys gweithiau nifer o artistiaid pwysig o gasgliad celf fodern Amgueddfa Cymru. Yn ogystal â hyn bydd comisiwn gosodwaith ffotograffiaeth gan yr artist Holly Davey a bydd Tim Davies yn cyflwyno’i waith ffilm o Biennale Fenis 2011.

Bydd naws y rygbi ar ei anterth yn Amgueddfa Genedlaethol y Glannau dros y penwythnos (dydd Sul 3 Mawrth) gydag ymweliad gan hyfforddwyr URC a chyn gapten rygbi Cymru Steve Fenwick.

Fel rhan o ddathliadau wythnos Cymru yn Chongqing 2013, bydd arddangosfa newydd sbon ar hanes Cymru, Wales, Land of the Red Dragon, a drefnwyd gan Amgueddfa Cymru, yn agor yn Amgueddfa Three Gorges yn Chongqing ar 4 Mawrth ac ar agor tan 30 Mehefin 2013.

Bydd Mantell Aur yr Wyddgrug yn mynd ar daith o’r Amgueddfa Brydeinig yr haf hwn ac yn cael ei harddangos yng Nghymru. Mewn partneriaeth ag Amgueddfa Cymru ac Amgueddfa ac Archifdy Bwrdeistref Sirol Wrecsam, dyma fydd y trydydd tro i’r fantell gael ei harddangos yng Nghaerdydd a bydd yn cael ei harddangos hefyd yn Wrecsam, nepell o’r man ble’i cafodd ei darganfod. Bydd y fantell i’w gweld am ddim yn y ddwy amgueddfa fel rhan o gynllun Spotlight Tours a drefnir gan Gynllun Partneriaeth y DU yr Amgueddfa Brydeinig.