Plant Y Dŵr: Pennod 1
Un tro, roedd 'na fachgen bach o'r enw Tom. Ei waith oedd glanhau simneiau. Roedd e'n byw mewn tref fawr yng Ngogledd Lloegr, lle'r oedd digonedd o simneiau i'w glanhau, a digonedd o arian i Tom ei ennill ac i'w feistr ei wario.
Doedd e ddim yn gallu darllen nac ysgrifennu, a doedd e ddim eisiau gwneud hynny chwaith; a doedd e byth yn molchi, achos doedd dim dŵr lle'r oedd e'n byw.
Roedd e'n llefain hanner yr amser ac yn chwerthin yr hanner arall. Roedd e'n llefain pan oedd e'n gorfod dringo'r simneiau tywyll, gan grafu ei benliniau a'i benelinoedd nes eu bod nhw'n gwaedu; a phan oedd y parddu'n mynd i'w lygaid - ac roedd hynny'n digwydd bob dydd o'r wythnos; a phan oedd ei feistr yn ei guro; a phan nad oedd yn cael digon i'w fwyta - ac roedd hynny'n digwydd bob dydd o'r wythnos hefyd.
Ac roedd yn chwerthin hanner arall y dydd, pan oedd e'n chwarae taflu dimeiau gyda'r bechgyn eraill, neu'n chwarae llam llyffant dros y pyst. Ac, am y gwaith glanhau simneiau, a bod ar lwgu eisiau bwyd, a chael ei guro, wel, fel'na roedd hi. Roedd rhaid dioddef hynny fel glaw ac eira a tharanau, ac edrych ymlaen at ddyfodol gwell.
