Rydych chi yn:  >   >   > 

Sut i Archebu

Archebu Lle

Rhaid i ysgolion a grwpiau archebu ymlaen llaw. Ffoniwch (029) 2057 3240 i gadw lle. Byddwn yn anfon cadarnhad ysgrifenedig o’ch archeb wedyn. Cofiwch ddarllen hwn yn ofalus.

Pris sesiynau wedi’u hwyluso

Codir tâl am sesiynau sy'n cyd-fynd â'r cwricwlwm, a sydd dan arweiniad staff yr amgueddfa. Mae pedwar pris gwahanol (heb gynnwys TAW):

  • Sesiwn hyd at awr o hyd ar gyfer hyd at 15 disgybl – £27
  • Sesiwn hyd at awr o hyd ar gyfer hyd at 35 disgybl – £42
  • Sesiwn hyd at hanner diwrnod ar gyfer hyd at 15 disgybl – £47
  • Sesiwn hyd at hanner diwrnod ar gyfer hyd at 35 disgybl – £77

Os, yn unol â’r ffigurau diweddaraf, yw’r Llywodraeth yn ystyried fod mwy nag 20% o ddisgyblion eich ysgol yn cael prydau ysgol am ddim, ni chodir tâl am y sesiynau.

Anfonir anfoneb i’ch ysgol ar ôl diwrnod yr ymweliad. Os byddwch yn canslo ar ôl 10am y diwrnod cyn y sesiwn neu os byddwch yn hwyr ac yn colli'ch sesiwn, rhaid talu’r anfoneb. Nid yw'r prisiau'n cynnwys TAW ond mae'r rhan fwyaf o ysgolion yn gallu ei hawlio'n ôl.

Does dim tâl i’r ysgolion canlynol:

  • Ysgolion yng Nghymru lle mae'r canran sy'n gymwys i gael prydau ysgol am ddim dros 20% (yn ôl ffigurau diweddara Llywodraeth Cymru).
  • Grwpiau Anghenion Addysgol Arbennig.
  • Uned Cyfeirio Disgyblion.

Cofiwch fod angen yr wybodaeth ganlynol wrth i chi archebu’ch lle:

  • Enw’ch ysgol / sefydliad
  • Cyfeiriad
  • Cod post
  • Rhif ffôn
  • Cyfeiriad e-bost
  • Enw’r athro / arweinydd y grŵp
  • Nifer y myfyrwyr
  • Ystod oedran
  • Nifer y staff
  • Pa orielau yr hoffech chi eu gweld?
  • Pa weithgareddau dan arweiniad yr hoffech chi eu harchebu?
  • Hoffech chi ymweld ag arddangosfa arbennig?
  • Ydych chi eisiau archebu lle i gael cinio?

Oriau agor

Dydd Mawrth i ddydd Sul, 10am – 5pm.

Cofiwch fod y swyddfa addysg ar gau ar benwythnosau a phob gŵyl y banc.

Iechyd a diogelwch

Mae gwybodaeth iechyd a diogelwch i’ch helpu i gwblhau asesiad risg ar gael yma.

Ymweld

Gall bysiau ollwng a chodi grwpiau o flaen prif fynedfa’r amgueddfa. Am gyfarwyddiadau a chysylltiadau cludiant, ewch yma.

Mynediad i bobl anabl

Mae canllawiau mynediad ar gael yma.

Ar ôl cyrraedd

Ewch i ddesg y dderbynfa i gofrestru fel arweinydd grŵp a dewch â chadarnhad o’ch archeb gyda chi. Bydd aelod o’n staff yn cwrdd â chi yn y Brif Neuadd ar gyfer unrhyw sesiynau wedi’u harchebu ymlaen llaw.

Ystafell ginio

Gallwch archebu lle ymlaen llaw i fwyta pecyn cinio yn Ystafell Clore, ar gyfer grwpiau o hyd at 60 am hanner awr ar y tro. Cofiwch fynd â’ch sbwriel adref i’w ailgylchu.

Lle i gadw cotiau a bagiau

Gallwch adael cotiau a bagiau mewn cypyrddau mawr â chlo.

[delwedd: Dim lluniau]

Ffotograffiaeth

Mae croeso i chi dynnu lluniau at ddibenion personol ac eithrio’r llefydd sy’n dangos y symbol hwn.

Rydym yn gofyn i’r holl ymwelwyr sy’n tynnu lluniau â chamera lofnodi ffurflen yn nesg y dderbynfa.

Ffonau symudol

Peidiwch â defnyddio’ch ffôn symudol yn yr Orielau er cwrteisi i ymwelwyr eraill.

Siop yr Amgueddfa

Mae’r siop yn gwerthu pob math o nwyddau amrywiol fel teganau bach, llyfrau a chardiau post. Helpwch i oruchwylio’ch grŵp drwy sicrhau nad oes mwy na 6 phlentyn yn y siop ar y tro.

Canllawiau’r Amgueddfa

Cofiwch gadw llygaid ar blant a phobl ifanc dan 14 drwy’r amser.

Peidiwch â rhedeg yn yr Orielau a chymerwch ofal wrth gerdded i fyny ac i lawr y grisiau.

Peidiwch â chyffwrdd â gwrthrychau, sbesimenau neu baentiadau, a pheidiwch â gadael olion bysedd ar y casys gwydr. Cewch gyffwrdd â chreigiau a mwynau yn Orielau Esblygiad Cymru, ac mae croeso i chi drin a thrafod gwrthrychau a sbesimenau yng Nghanolfan Ddarganfod Clore.

Ymweliadau rhagflas

Mae’r rhain ar gael i athrawon neu arweinwyr grwpiau sydd am gynefino â’r Amgueddfa. Ffoniwch i drefnu ymlaen llaw os ydych chi’n dymuno siarad ag aelod o’r tîm Addysg ar ddiwrnod eich ymweliad rhagflas.

Newid arddangosfeydd

Os ydych chi’n bwriadu dod i weld gweithiau celf, sbesimenau neu arteffactau penodol, cofiwch wirio eu bod yn cael eu harddangos. Efallai y bydd anghenion cadwraeth, benthyciadau ac ailwampio yn arwain at newid arddangosfeydd.

Tân

Os bydd tân, bydd larwm yn canu. Dylai’ch grŵp adael yr adeilad trwy ddilyn yr arwyddion i’r allanfa agosaf. Cewch gyfarwyddiadau gan Gynorthwywyr yr Amgueddfa.

Cymorth Cyntaf

Os bydd angen cymorth cyntaf, cysylltwch ag un o gynorthwywyr neu hwyluswyr yr Amgueddfa, a fydd yn galw am rywun sydd wedi cael hyfforddiant cymorth cyntaf.

Plant ar goll

Dywedwch wrth blant am roi gwybod i aelod o staff yr Amgueddfa os ydyn nhw ar goll. Bydd Cynorthwyydd yr Amgueddfa yn cysylltu â’r grŵp ac yn trefnu bod y plentyn yn cael ei hebrwng i’r Brif Neuadd er mwyn i oedolyn o’r grŵp ei gasglu.

Unrhyw argyfwng arall

Os bydd unrhyw argyfwng arall, cysylltwch â Chynorthwyydd yr Amgueddfa.

Polisi amddiffyn plant

Mae polisi amddiffyn plant yr amgueddfa ar ein gwefan yma.

Arlunio yn yr Orielau

Mae croeso i chi arlunio ym mhob oriel. Byddwch yn ofalus, fodd bynnag, gan ei bod hi’n hawdd difrodi gweithiau celf. Er mwyn lleihau peryglon o’r fath, dilynwch y canllawiau canlynol:

  • Peidiwch â chyffwrdd ag unrhyw baentiad na gwrthrych.
  • Cadwch unrhyw fyrddau arlunio a deunyddiau celf yn ddigon pell oddi wrth y waliau, gwrthrychau a gweithiau celf.
  • Peidiwch â defnyddio deunyddiau gludo na chwistrellu yn yr orielau.
  • Gallwch ddefnyddio’r canlynol yn yr orielau – pensiliau lliw, creonau cwyr, pasteli olew, pensiliau arlunio, ffyn graffit, ffyn gludo (e.e. pritt) a deunyddiau collage (e.e. papur lliw, siswrn, llinyn ac ati)
  • Os ydych chi’n defnyddio paent, siarcol a phasteli, cofiwch ddod â rhywbeth gyda chi i orchuddio’r llawr. Yn ddelfrydol, dim ond myfyrwyr celf ac oedolion ddylai defnyddio’r rhain yn yr orielau.